O PSdeG de Antas denuncia que o Concello incumpre a lei de protección de animais tras a morte dun can extraviado

Os socialistas esixiremos no pleno que o goberno local cumpra a normativa autonómica e asine un convenio cunha protectora ou ben constrúa unhas instalacións adecuadas, e lamentan “a desidia e falta de responsabilidade do equipo de goberno” tras recibir a alerta veciñal, “algo que xa pasou máis veces”

Dende o PSdeG de Antas denunciamos que o Concello incumpre a lei da Xunta de Galicia para a protección dos animais, despois de comprobar que “non ten un convenio asinado coa Sociedade Protectora de Animais e Prantas de Lugo nin tampouco conta con instalacións propias para atender e albergar animais e dar resposta a estes problemas no término municipal, tal e como esixe a normativa autonómica”. Os socialistas levaremos este asunto ao próximo pleno tras realizar estas comprobacións, despois de que os responsables locais non responderan á alerta veciñal polo estado dun can extraviado con collar que finalmente morreu “pola desidia e falta de responsabilidade do equipo de goberno”.

Os socialistas apuntamos que a pasada semana, un veciño de Antas atopou un can ferido que non era capaz de moverse nun terreo próximo á aldea de Vilaboa, xunto a unha propiedade municipal na que está ubicada a fosa de decantación dos residuos urbanos. “Este veciño avisou á Garda Civil, que lle indicou que o responsable nestes casos é o Concello. Nese momento puxo este feito en coñecemento do tenente de alcalde, pero ao día seguinte comprobou que non fixeran nada e o can estaba morto. Non estaba abandoado, porque tiña collar”, explica a nosa voceira, Pilar García Porto.

“Como era fin de semana e o Concello estaba pechado, ese día avisou de novo por teléfono, e ao non presentarse ninguén, púxose en contacto coas autoridades do SEPRONA, que lle explicaron de novo que a responsabilidade era do Concello”, di a socialista. García Porto explica que ante estas situacións os concellos poden actuar de dúas meneiras para cumprir coa lei: “Ou ben asinando un convenio cunha protectora de animales para que actúe ante un caso así, ou cun lugar acondicionado para albergar estes animais e atendelos”, algo que no caso de Antas non sucede.

No próximo pleno, os socialistas presentarán unha iniciativa para que “o Concello rubrique un convenio coa sociedade protectora ou con outro terceiro, ou ben para que se constrúan os espazos necesarios para coidar os animais abandonados ou extraviados” no municipio. “En épocas de caza ou próximas é frecuente atopar cans desorientasdos polas rúas ou cunetas”, lembran os socialistas, que lamentan que “non é a primeira vez que algo así se pon en coñecemento do Concello”, e destacan que “para os veciños supón unha responsabilidade e un risco atender un animal sen dono”. Desde o PSdeG indican tamén que “moitas veces os propios propietarios non atopan os animais que se extravían porque non teñen un lugar concreto de referencias para recollelos, e caban sucedendo estas cousas”.

O Valedor admite a trámite a queixa en Antas pola posible “ilegalidade” na convocatoria do pleno dos orzamentos

A oposición puxo unha reclamación hai un mes ante o Valedor do Pobo por non ter o tempo que marca a normativa para poder analizar as contas públicas

 

O PSdeG vén de rexistrar ademais varias alegacións aos orzamentos, entre elas o incumprimento de prazos, a falta de información sobre subvencións otorgadas ou o rexistro como ingresos de axudas que aínda non foron concedidas

 

O Valedor do Pobo vén de admitir a trámite a reclamación do grupo socialista de Antas e dos nacionalistas pola posible convocatoria “ilegal” do pleno do pasado mes de marzo realizada polo alcalde, o popular Javier Varela, que adiantou a data unha semana sen avisar cos dous días hábiles de antelación que marca a normativa. No pleno, lembran os socialistas, debatíanse temas “de moita relevancia para o municipio”, como a aprobación inicial dos orzamentos municipais de 2013, a aprobación definitiva das contas de 2012 ou a modificación dos estatutos e os membros do consello de administración da polémica empresa municipal Épica. Toda a oposición abandonou o pleno hai un mes ante a “falta de información e o escurantismo” do goberno local, que non deu tempo a revisar a documentación para poder debater sobre as contas públicas.

 

Alegacións do PSdeG aos orzamentos

Por outra banda, o PSdeG vén de rexistrar en tempo e forma alegacións aos orzamentos municipais. En ditas alegacións reflíctese tamén a posible “ilegalidade” na convocatoria do pleno de marzo para a aprobación inicial dos orzamentos, e recóllense asimesmo outras presuntas “irregularidades” nas contas, entre elas a presentación dos orzamentos fóra do prazo establecido , que tiña como data límite o pasado 12 de abril, ou a “falta de información” sobre as subvencións. Os orzamentos municipais só recollen dúas subvencións concedidas á Sociedade Deportiva Antas e ás festas parroquiais, e os socialistas reclaman que se recollan todas as axudas a asociacións e entidades “nominalmente”, para asegurar “a transparencia e os criterios obxectivos na concesión de subvencións”, como explica a voceira do PSdeG no concello, Pilar García Porto.

 

A outra reclamación dos socialistas no apartado de subvencións refírese aos ingresos reflectidos nos orzamentos. Neste punto, o Concello calcula os ingresos tendo en conta as subvencións xa concedidas pero tamén as que son previsibles e aínda non están concedidas e incluso as que só están solicitadas. “Cremos que isto non é serio e que pode falsear as contas municipais, polo que reclamamos que o goberno local se centre en rexistrar os cartos que xa están oficialmente recoñecidos”, apunta García Porto.

A oposición ao completo abandona o pleno de Antas tras a convocatoria “ilegal” realizada polo alcalde

Xa presentamos unha queixa por escrito diante do Valedor do Pobo, e estamos pendentes do informe da Secretaría municipal

O grupo socialista de Antas e os nacionalistas abandonamos esta mañá o pleno de Antas de Ulla pola convocatoria “ilegal” realizada polo alcalde, o popular Javier Varela, que adiantou a data unha semana sen avisar cos dous días hábiles de antelación que marca a normativa. A situación é “aínda máis grave” porque no pleno se debatían temas “de moita relevancia para o municipio”, como a aprobación definitiva das contas de 2011, a aprobación inicial dos orzamentos municipais de 2013 ou a modificación dos estatutos e os membros do consello de administración da polémica empresa municipal Épica. Os membros da oposición critican que o goberno local non lles deu tempo para poder comprobar a documentación. “De novo o goberno do PP xoga coa falta de información e o escurantismo para facer e desfacer ao seu xeito, sen o mínimo sentido democrático, o que á súa vez é unha falta de respecto aos veciños e veciñas de Antas".

Presentamos antes do pleno a posibilidade de invalidar a convocatoria e volver a realizala ou o aprazamento e retirada dalgúns puntos. O alcalde negouse, e argumentou que os iban aprobar igual por ter a maioría absoluta, “nunha mostra do tipo de política déspota que fai o PP”. O rexedor propuxo, pola súa banda, seguir co pleno e incluir estes puntos no futuro para debatelos. “Quere que debatamos algo despois de estar xa votado e aprobado en pleno cunha convocatoria que el sacou da manga dun día para outro, cando o que hai que arranxar é que nos dean a posibilidade de coñecer os documentos para poder votar dun xeito coherente".

A oposición presentou unha queixa por escrito diante do Valedor do Pobo. Ademais, antes do pleno, O PSdeG envioulle un escrito ao alcalde que foi ignorado, e outro á Secretaría municipal para emitir un informe sobre a convocatoria do pleno, que están pendentes de recibir.

 

 

 

 

O PSdeG de Antas celebra que a Deputación invista na traída de auga, “unha demanda histórica” no concello

O grupo socialista está “moi satisfeito” de que o ente provincial asuma a obra ao 50% despois de que o Goberno Central deixara sen dotación a gran parte do Plan de Obras e Servizos, agardan que este sexa “o primeiro paso” para dotar de auga potable a todo o concello e lémbranlle ao PP que “hai moito que facer”

O Grupo municipal socialista de Antas de Ulla mostrase “moi satisfeito” co investimento realizado pola Deputación de Lugo na traída do concello, cunha obra prevista de “substitución parcial da rede de abastecemento de auga” e que vén a arranxar en gran parte o que xa era “unha demanda histórica” do PSdeG no concello e “unha necesidade para os veciños e as veciñas de Antas”. Despois de que o Goberno Central deixara sen dotación económica a parte do Plan de Obras e Servizos (POS), cun recorte de 2,7 millóns de euros na provincia de Lugo, a Deputación Provincial decidiu continuar adiante co POS aportando a súa parte e dándolle a posibilidade aos concellos de aportar ao 50% para continuar realizando obras na provincia.

”Ao longo de cinco anos presentamos numerosas iniciativas e reclamacións ao alcalde, xa que a rede está completamente deteriorada”, afirma a voceira socialista no concello, e engade que “as averías e roturas de tuberías son numerosas, e no verán prodúcese desabastecemento de auga potable, ademais de que as tuberías son de fibrocemento e hoxe xa non están autorizadas para uso sanitario pola súa toxicidade”. Este proxecto comprende a substitución parcial da rede de abastecemento de auga potable no casco urbán, concretamente no Camiño de Vilasión, e comprende o traxecto desde los depósitos de acumulación ata o Camino de Vilasión e posteriormente a súa continuación ata o encontro coa  rede de distribución na Rúa Nova. A financiación do orzamento, que ascende a 26.313,72€, será asumida no 50% pola Deputación e no 50% restante polo concello.

En palabras dos concelleiros socialistas “trátase duhna actuación necesaria e urxente que garantizará un abastecemento que cumpra coas normas sanitarias vixentes, pero insuficiente para satisfacer as necesidades actuais do núcleo urbano de Antas de Ulla, xa que a traída está deteriorada en moitos máis puntos e tamén as tuberías son de fibrocemento noutros tramos”. Neste sentido, lémbranlle ao PP que “hai moito que facer, e habería que empezar por ter en condicións os tanques do Monte Farelo que permanecen abertos e sen control todo o ano permitindo o acceso de animais ou persoas ao seu interior, tal e como denunciamos en numerosas ocasións, e habería que solucionar os problemas de abastecemento”. Así, critican que o Goberno Central destinase arredor de 600.000€ para a construcción dun tanque que non existe, e engaden que “hai moitas aldeas que aínda non teñen traída e outras nas que non funciona, como foi o caso de Olveda” este pasado verán. ”Agardamos que este sexa o primeiro paso para dotar de auga potable á poboación de todo o Concello e sentímonos orgullosos de que dende a Deputación se contribúa a dar solución a este vello problema dos veciños de Antas”, conclúen.

OS PORTAVOCES SOCIALISTAS DOS CONCELLOS DE TABOADA, PORTOMARÍN, PALAS DE REI E ANTAS DE ULLA ANUNCIAN QUE REALIZARÁN UN EXAUSTIVO CONTROL E SEGUIMENTO DOS OBRADOIROS NOS SEUS CONCELLOS

Os últimos datos do paro resultan especialmente duros para o interior da provincia de Lugo, e mesmo chegan a triplicar a media galega.

 

O proceso selectivo que  terá lugar o vindeiro luns día 10 de decembro levanta sospeitas  por falla de imparcialidade segundo manifestaron algúns veciños destes catro concellos ós voceiros da oposición.

 

Os representantes do PSdeG-PSOE nestes concellos do interior lucense levarán a cabo iniciativas  nos seus concellos coa finalidade de exercer a labor de control necesaria e defender así os intereses dos seus veciños en igualdade de oportunidades.

 

Lugo, 7 de decembro do 2012. Os Concellos de Antas de Ulla, Palas de Rei, Taboada e Portomarín asociáronse para solicitar de xeito conxunto ante a Consellería de Traballo os obradoiros de emprego para a anualidade 2012. Esta nova resultou valorada positivamente polos 14 concelleiros socialistas destas poboacións pois segundo manifestaron nunha xuntanza celebrada esta semana para analizar a situación de desenvolvemento das políticas municipais levadas a cabo nos seus concellos “de cumplirse as expectativas de inserción laboral da Xunta o 70% dos alumnos debería atopar traballo unha vez rematados os obradoiros, e nós velaremos para que o esforzo dos alcaldes sexa máximo neste sentido”.

En declaracións feitas polos voceiros socialistas din estar seriamente preocupados polas críticas situacións que están vivindo as familias víctimas da dura situación de desemprego de parte dos seus membros que fai tambalear as economías domésticas. Así manifestan “se os índices do paro son máis que preocupantes en todo o país na nosa zona resultan alarmantes xa que chegamos a triplicar a  media galega con respecto ó mesmo mes do ano anterior, é decir fai un ano".

Segundo datos da Consellería de Traballo os catro concellos contaron no mes de novembro con 651 persoas en situación de desemprego (Antas de Ulla 134, Palas de Rei 240, Portomarín 86 e Taboada 191), e incrementaron en total o número de parados en 86 persoas máis que no mes de outubro.

Destacan tamén outros datos oficiais por comarcas ás que pertencen estes catro concellos, e que se relacionan no seguinte cadro:

 

	Nº DE PARADOS MES DE NOVEMBRO	% RESPECTO Ó ÚLTIMO MES	% RESPECTO Ó MESMO MES DO ANO ANTERIOR
GALICIA	276.536	3,26%	9,12%
PROV. LUGO	27.903	6,00%	11,52%
COMARCA DE LUGO	11.116	6,23%	10,43%
COMARCA DE CHANTADA	1.012	4,76%	11,70%
COMARCA DA ULLOA	639	9,23%	28,57%

 

Os voceiros socialistas despois de levar a cabo unha xuntanza de análise e balance de políticas municipais, e ante a dolorosa realidade que moitos desempregados e as súas familias están vivindo na Comarca Suroeste da provincia, quixeron poñer de manifesto a crítica situación destes concellos do interior lucense, e así aclaran “na provincia de Lugo  o índice do paro con respecto ó mes anterior é o doble que en Galicia, un 6% fronte ó 3,26 da Comunidade Autónoma”, e engaden “o caso máis sangrante é a Comarca da Ulloa, mentras que que en Galicia o paro subiu un 9,12% en comparación co mes de novembro do 2011 na nosa comarca esta cifra triplicouse e atopámonos nun 28,57%".

Ante a inminente proba selectiva para desempregados que se incorporarán ó obradoiro de emprego solicitado conjuntamente polos catro concellos, que se celebrará o vindeiro luns día 10, e as queixas de veciños manifestadas ós socialistas por non ter coñecemento do proceso selectivo ou mesmo porque algún deles manifestou que antes da publicación da orde xa sabía por fontes municipais que non ía ter opcións aínda cumplindo cos requisitos para entrar na selección.

Ante estas e outras presuntas irregularidades detectadas  e coa finalidade de velar pola igualdade de oportunidades para todas persoas en situación de ser incluídas nestes obradoiros os grupos municipais do PSdeG-PSOE levarán a cabo iniciativas ós distintos plenos e realizarán unha exhaustiva labor de seguimento e control dende o proceso de selección  ata a adxudicación dos obradoiros. En alusión a esto pronuncian “faremos todo o necesario para que participen nestes obradoiros os que teñan dereito, en igualdade de oportunidades,  non permitiremos a entrada a dedo, nin o uso partidista ou con carácter electoralista desta oportunidade laboral para moitas persoas”, “despois de ver o reparto partidista e sectario de obradoiros feito polo PP nos concellos desta provincia esixiremos un proceso e desenvolvemento límpios e transparentes a favor da imparcialidade entre veciños no que se beneficien aqueles que realmente o necesitan e teñen dereito, tal e como indica a orde da Consellería de Traballo”.

OS SOCIALISTAS DE PORTOMARÍN E ANTAS DE ULLA LAMENTAN QUE OS SEUS CONCELLOS PERDAN FONDOS ESTATAIS POR NON PRESENTAREN A LIQUIDACIÓN DAS CONTAS DO 2011

Estes dous concellos do suroeste da provincia de Lugo son os únicos do partido xudicial de Chantada que se atopan nesta situación. O concello de Antas  perderá cada mes 28 268 € e o de Portomarín 18 571 €, cantidades  moi importantes na economía destes pequenos municipios.

Lugo, 02 de novembro  de 2012. Ámbolos dous concellos recibiron esta semana unha comunicación do Ministerio de Facenda en que se informa que se practicará unha retención nas transferencias previstas do mes de outubro, porque en ámbolos casos incumpriron a norma que obriga os concellos a comunicárenlle ao dito Ministerio a liquidación dos seus presupostos.

No caso de Antas a situación non resulta novidosa, pois desde que Javier Varela herdou a alcaldía, o concello de Antas de Ulla vive sumido nunha penosa e caótica situación económica, debido ao desleixamento de funcións nesta materia por parte do alcalde e do seu equipo de goberno.

A finais do ano pasado presentáronse as contas do concello e da empresa municipal ÉPICA, sen cumprir os requisitos pertinentes e presentando numerosas irregularidades, como así o testemuñaba o informe negativo realizado pola secretaría-intervención. “Esta situación non mellorou e non se presentou o orzamento para o 2012 nin a liquidación de contas do 2011” manifesta a voceira socialista deste concello, que engade: “é imposible gobernar un concello sen ter as contas claras,  pérdense ingresos e non se sabe o que se gasta”.

Escurantismo e ocultación de información en ámbolos  casos

Os socialistas aclaran tamén que o afán por ocultar información é unha constante dos dous  alcaldes, que continuamente dificultan o labor e o traballo dos concelleiros na fiscalización e control dos equipos de goberno; “non se nos permite o acceso a diferente documentación municipal, como son a relación de usuarios de auga ou a recadación pola regularización de vivendas; este afán recadador do alcalde xoga en contra das economías familiares deste concello, que o único que fan é pagar impostos sen saberen a que os vai dedicar o equipo de goberno”, manifestan desde Antas de Ulla.

A partir do presente mes, o concello de Antas de Ulla deixa de ingresar na conta arredor de 30 000 € cada mes, una cantidade significativa para un concello de menos de 2500 habitantes, xa que o ano supoñen 360 000 €, sesenta millóns das antigas pesetas. Isto repercute directamente nas contas municipais, pois pode afectar ás nóminas, ao gasto corrente ou aos pagos por gastos ordinarios. Pilar cualifica os feitos de “desidia, abandono irresponsabilidade, desinterese e mesmo vagancia do alcalde e o seu equipo”, ademais aclara que “o PP de Javier Varela aumentou os gastos coas asignacións que cobran os seus concelleiros e as dos grupos políticos, naquel momento a proposta dos socialistas foi non cobrar por seren concelleiros, e eles aumentaron as asignacións”, así cualifican a actuación de “lamentablemente dilapidadora e interesada no seu propio beneficio”.

No caso de Portomarín, a voceira municipal Silvia Rodríguez Díaz non entende o que pasa coas contas do concello desde que accedeu a Alcaldía Juan Serrano, posto que nos anos anteriores nunca existiron este tipo de problemas e sempre se presentaron en prazo as liquidacións, cuxa aprobación depende exclusivamente da alcaldía. Silvia Rodríguez pregúntase “se se está a seguir a mesma política de ocultismo e falta de transparencia ca cos grupos da oposición, xa que o Concello de Portomarín non está informando das súas contas ao Ministerio de Facenda e Administracións Públicas”. Silvia Rodríguez lamenta esta situación, posto que máis de 18 000 € ao mes son uns ingresos fundamentais para o Concello de Portomarín, e isto pode chegar a provocar graves problemas de liquidez e afectar a pagos por gastos ordinarios ou ás nóminas. Ante esta situación “chegamos a entender por qué o alcalde di sempre que non hai cartos no concello, porque nestes últimos meses estamos asistindo a unha perda sistemática de ingresos, como no caso da recadación do Albergue Municipal ou da Piscina Municipal, e a retención dos fondos que ingresa mensualmente o Ministerio de Facenda xa é a gota que colmou o vaso, totalmente inadmisible para un concello que depende en boa medida destes ingresos para o seu funcionamento diario”, afirma Silvia Rodríguez.

Por estes motivos, en ámbolos casos, e tendo en conta que nos dous concellos non se celebrará pleno ordinario ata o vindeiro mes de decembro, os grupos municipais socialistas presentarán senllas propostas á alcaldía para que se teña en conta a situación e e para que desde os equipos de goberno se poñan a traballar coa finalidade de daren conta das liquidacións do 2011, de xeito que se poña solución canto antes a este problema económico que só afecta a estes dous concellos do suroeste lugués.

OS SOCIALISTAS DE ANTAS LAMENTAN A POSIBLE IMPLICACIÓN DO ALCALDE NO COBRO DE COMISIÓNS ILEGAIS A UNHA EMPRESA ADXUDICATARIA DE VARIAS OBRAS DO CONCELLO

Os socialistas anuncian que esixirán ante o concello o acceso a toda a documentación das obras adxudicadas a EXCAMEL, S.L.  para levaren a cabo un rigoroso control e análise das mesmas

Antas de Ulla, 07 de outubro de 2012. O diario El País publicou con data do 7 de outubro de 2012 unha nova en que se relata a posible implicación do alcalde de Antas no cobro de comisións ilegais á empresa Excamel, adxudicataria de varias obras  en Antas de Ulla, entre as que se atopan as últimas do Plan E correspondentes á anualidade 2010, e que, tal e como figura na web do Ministerio de Política Territorial, están aprobadas para o concello de Antas de Ulla.Trátase de dous proxectos cos seguintes orzamentos:

186 586,97 €   Dotación de infraestructuras, mejoras y conservación del área de especial interés de Augas

83 573,02 €     Puesta en valor y mejoras de los edificios de propiedad municipal sitos en As Canteiras

Xa no seu momento o Grupo Municipal Socialista de Antas advertira que “para levar a cabo a contratación dos case 400 000 € do Plan E do 2009 e dos preto de 300 000 € do 2010, o alcalde non quixo contar con empresas do noso concello. O procedemento legal indica que o alcalde tiña a obriga de convidar como mínimo a tres empresas para que concorreran á licitación, pero, curiosamente, ningunha delas  foi do noso concello”.

A empresa que executou as obras do 2009 foi  LUIS TABOADA S.L., de Vila de Cruces. En canto ás obras para realizar durante o ano 2010, a empresa adxudicataria foi EXCAMEL S.L. de Melide,  a continuación detallaremos as ofertas realizadas polas distintas empresas que concorreron o sorteo público en Antas de Ulla o día 21 de maio de 2010:

Puesta en valor y mejoras de los edificios de propiedad municipal sitos en As Canteiras (83 573,02 €)

            Excamel S.L.                               82 999 €  (Adxudicataria)

            Vázquez y Mesías S. L.           83 573,02 €

            Rafer S.L.                                      83 573,02 €

Dotación de infraestructuras, mejoras y conservación del área de especial interés de Augas (186 586,97 €)

            Excamel S.L.                               185 948 €  (Adxudicataria)

            Vázquez y Mesías S. L.           186 897 €

            Rafer S.L.                                      186 586 €

Declaran os concelleiros a través da súa voceira “xa no seu momento chamounos poderosamente a atención o feito de comprobarmos a coincidencia, ata nos céntimos!, da oferta realizada polas empresas non adxudicatarias da primeira obra, como tamén resultaba sorprendente que a única que presentou o correspondente certificado de solvencia bancaria para ambas as dúas obras fose  EXCAMEL S.L.”.

Noutra orde de cousas, os socialistas quixeron sinalar que o alcalde e o seu grupo de goberno seguen ocultando información sobre varios proxectos desenvolvidos no concello de Antas de Ulla e que, cando menos, resultan sospeitosos de presentaren irregularidades. Este é o caso do Horto Ecolóxico de Frádegas, en que se superpoñen claramente varios proxectos con distintas denominacións para o lugar de localización e de realización das obras, así como co cobro de subvencións procedentes de distintas administracións, e que claramente non cumpriron os prazos estipulados de desenvolvemento nin os fins orixinarios para os que foron concibidos. En concreto aclaran: “tal e como advertimos no seu momento o proxecto do Plan E denominado  Dotación de infraestructuras, mejoras y conservación del área de especial interés de Augas (186 586,97 €), antes foi o Centro Sostible de Ecoloxía Aplicada, tamén coñecido como Horto Ecolóxico, en que se certificaron  400 000 € con cargo ao programa europeo INTERREG III A, proxecto RURALIS SP1.P166/03”.

A estes puntos facía referencia o informe de denuncia das contas do concello do secretario-interventor municipal, Francisco Torrente Hortas, en que expoñía “presuntos ilícitos penais como os de malversación de fondos públicos, falsidades documentais, dilación indebida e obstrución dos labores de investigación do Tribunal de Contas e do Valedor do Pobo, prevaricación, contratación ilegal de persoal municipal, impedimento dos dereitos que a Constitución e a Lei recoñecen aos membros electivos da Corporación e outros”.

Perante esta situación, os concelleiros socialistas manifestan que esixirán por escrito a documentación relativa a todas as obras executadas por Excamel S.L. en Antas de Ulla, coa finalidade de analizar en detalle e comprobar que non se producisen irregularidades na adxudicación e na realización das obras.